• අනුරට පෙනෙන “රාජපක්‍ෂ ඉඩම්” හා නොපෙනෙන “මෛත්‍රී ඉඩම්”

    පසුගිය දිනවල ජනතා විමුක්ති පෙරමුණේ නායකත්වය රජජපක්‍ෂවරුගේ ඉඩම් පිළිබඳ පාර්ලිමේන්තුවේදී ප්‍රකාශයක් කළේය. රාජපක්‍ෂවරුන්ට ඉඩම් 21ක් තිබෙන බව ඔහු පැවසීය. ඩී.ඒ. රාජපක්‍ෂ, ලක්ෂ්මන් රාජපක්‍ෂ, ජොර්ජ් රාජපක්‍ෂ සහ අනෙක් පැත්තෙන් නිරූපමා රාජපක්‍ෂ, චමල් රාජපක්‍ෂ, ගෝඨාභය රාජපක්‍ෂ, ඩඩ්ලි රාජපක්‍ෂ, ගාන්ධිනී රාජපක්‍ෂ, ප්‍රීති රාජපක්‍ෂ වැන්නන් හා මා ඇතුළත්ව අප පරම්පරාවට ඇත්තේ ඉඩම් 21කි.

    අප හට අනුර කුමාරගෙන් ඇසීමට ඇත්තේ මෑත දවසක මෛත්‍රීපාල සිරිසේන මහතා විසින් නුවරඑළියේ විවෘත කළ හෝටලය පිළිබඳ හා සිරිසේන මහතාගේ ඉඩම් පිළිබඳවය. ජනාධිපතිවරණ සමයේදී අතෙහි මුදල් නොමැති, සරල, බෝල්ට්පොයින්ට් පෑනෙන් අත්සන් තබන බව පැවසුවද, අතේ සතේ නැති අය නුවරඑළියට ගොස් රුපියල් කෝටි ගණනක හෝටලයක් විවෘත කිරීමට කටයුතු කළේය.

    පොළොන්නරුවේ වැව් ගොඩකර හෝටල් සැදූ බව කියැවුණේ ජනපති මෛත්‍රීපාල සිරිසේන මහතාගේ පරම්පරාවේ පිරිස් පිළිබඳවය. අප නොව අග්‍රාමාත්‍ය රනිල් වික්‍රමසිංහ මහතා වරක් පොළොන්නරුවට පැමිණ ඒ පිළිබඳ පැවසීය.

    ඔහු පැවසුවේ, සිරිසේන මහතායි, ඔහුගේ පවුලේ අයයි වැව් ගොඩකර හෝටල් ඉදිකළා යනුවෙනි. රෝහිත අබේගුණවර්ධන, කාංචන විජේසේකර, ඩලස් අලහප්පෙරුම හා මම මෛත්‍රීපාල සිරිසේන මහතා වෙනුවෙන් කතා කළෙමු.

    එදා වැලි මාෆියාව, හාල් මාෆියාව, ගස් මාෆියාව ගැන පැවසුවේය. වර්තමානයේ මෙම දූෂණ විරෝධී පෙරමුණට මේ පිළිබඳ නොපෙනෙන්නේදැයි ඇසිය යුතුය. දුප්පත් පුද්ගලයෙකු ව්‍යාපාර කර ඉහළට ඒම පිළිබඳ අපගේ කිසිදු විරුද්ධත්වයක් නොමැත. අපි එයට කැමැත්තක් දක්වනවා සේම එයට ගරු කරන්නෙමු. අනෙක් අයට වළකපා, ඇඟිල්ල දිගුකර, හොරා යැයි මඩ ගසා තම කටයුතු වසාගැනීමට කටයුතු කරන්නේ නම් එය අසාධාරණ ක්‍රියාවකි.

    පළාත් පාලන මැතිවරණයට අදාළ ඡන්ද විමසීමේ පනත් කෙටුම්පත පාර්ලිමේන්තුවේදී සම්මත කර අවසන්ය. දැන් එය මැතිවරණ කොමිසමට යොමුකළ යුතුය. එය ඉතා ඉක්මනින් සිදුවුවහොත් මේ වසරේ අ.පො.ස. සාමාන්‍ය පෙළ විභාගයට පෙර මැතිවරණය පැවැත්වීමට මැතිවරණ කොමිෂන් සභාව සූදානමින් සිටී. අප බලාපොරොත්තු වන්නේද මැතිවරණය ඉතා ඉක්මනින් පවත්වනු ඇති බවය. එහිදී ආණ්ඩුව කෙරෙහි ජනතාවගේ ඇති විරෝධය හොඳින්ම ඔවුන්ට දැක ගැනීමට හැකි වෙනු ඇත. පළාත් පාලන මැතිවරණය ඒකාබද්ධ විපක්‍ෂය මේ වනවිට ශ්‍රී ලංකා පොදුජන පෙරමුණත් සමග පුළුල් සන්ධානයක් සැකසීමට කටයුතු කරමින් තිබේ. ඒ අනුව ඒකාබද්ධ විපක්‍ෂය නියෝජය කරන ශ්‍රී ලංකා නිදහස් පක්‍ෂ මන්ත්‍රී කණ්ඩායම එම සන්ධානයත් සමග මැතිවරණයට යෑමට මේ වනවිට තීරණය කර අවසන්ය.

    වත්මන් ආණ්ඩුවේ ක්‍රියාකලාපය මත ශ්‍රී ලංකා නිදහස් පක්‍ෂය සමග මැතිවරණයට යෑමට හැකියාවක් නොමැත. ඒ ආණ්ඩුවේ පාපකාරී වැඩපිළිවෙළට අපට සහයෝගය ලබා දිය නොහැකි බැවිනි. මේ පාපකාරී වැඩ සඳහා නිදහස් පක්‍ෂය එක්සත් ජාතික පක්‍ෂයටත්, එක්සත් ජාතික පක්‍ෂය නිදහස් පක්‍ෂයටත් ඇඟිල්ල දිගුකර බේරීමට නොහැකිය. ඒ සඳහා ජනපති මෛත්‍රීපාල සිරිසේන මහතාත්, අග්‍රාමාත්‍ය රනිල් වික්‍රමසිංහ මහතාත් ඍජුව වගකිව යුතුය.

    ආණ්ඩුව පැමිණියේ රට තුළ ප්‍රජාතන්ත්‍රවාදය ස්ථාපිත කිරීමටය. කෙසේ වෙතත් වසර දෙකහමාරක් පමණ කල් තැබූ පළාත් පාලන මැතිවරණය පැවැත්වීමට සූදානම් වනවාත් සමගම අනෙක් අතින් පළාත් සභා මැතිවරණය කල්දැමීමට ආණ්ඩුව සූදානම් කර තිබේ.

    ඒ සඳහා ඔවුන් 20 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත ගෙනැවිත් තිබේ. කෙසේ වෙතත් එම පනත් කෙටුම්පත අපි ඉදිරියේදී ශ්‍රේෂ්ඨාධිකරණය හමුවේ අභියෝගයට ලක්කිරීමට කටයුතු කරන්නෙමු. මේ හරහා ඔවුන් බලාපොරොත්තු වන්නේ පළාත් සභා මැතිවරණයද තවත් වසර දෙකකින් පමණ කල්දැමීමටය. ආණ්ඩුවේ බොරුව හා පතිවත මෙයින් හෙළිව තිබේ.

    මේ අතර ආණ්ඩුව නව දේශීය ආදායම් පනත් කෙටුම්පත පාර්ලිමේන්තුවට ඉදිරිපත් කළේය. මේ හරහා ඉතා අපහසුවෙන් එදිනෙදා ජීවිතය ගැටගසා ජනතාව තවදුරටත් අගාධයට යොමුකර තිබේ. මහින්ද රාජපක්‍ෂ රජය ලබාදුන් සියලු බදු සහන මෙම පනත හරහා ඉවත් කර තිබේ.

    මෙම පනත් කෙටුම්පත් පාර්ලිමේන්තුවට ඉදිරිපත් කිරීමෙන් ආණ්ඩුව වැරදි පූර්වාදර්ශයක් ලබාදෙමින් සිටියි. මූලික පනත ගෙනෙන විට ඔවුහු ගැටලු නොමැතිව සාමන්‍යයෙන් හොඳ පනතක් පාර්ලිමේන්තුවට ඉදිරිපත් කරති. නමුත් පනතට එරෙහිව අභියෝග  කිරීමට ඇති කාලය අවසන් වූ විට ඔවුන් කරනුයේ සංශෝධන කරමින් එය වෙනස් කිරීමය. ඒ හරහා අවසන් වරට පාර්ලිමේන්තුවේදී සම්මත වන්නේ මුලින් ඉදිරිපත් කළ පනත නොව, වෙනස්ම පනතකි. මෙය පාර්ලිමේන්තු සම්ප්‍රදායට පටහැණි අතර ප්‍රජාතන්ත්‍රවාදී විරෝධීය. අණ්ඩුව මෙය දිගින් දිගටම ගෙනගිය හොත් අවසානයේදී ව්‍යවස්ථාව සම්මත කිරීමට මෙම ක්‍රියාමාර්ගයම ගනු ඇත.

    සමෘද්ධිය පිළිබඳ ගැටලුව අප තවදුරටත් අධිකරණය හමුවට ගෙන යෑමට සූදානම්ය. එහිදී අධිකරණයෙන් සාධාරණයක් ඉෂ්ට වෙතැයි අපෙක්ෂා කරන අතර, ජනතාවගේ මානව හිමිකම් කඩකිරීමට විරෝධය දක්වමින් මානව හිමිකම් කොමිසමටද පැමිණිල්ලක් ඉදිරිපත් කිරීමට කටයුතු කරන්නෙමු.

  • හවුල් ආණ්ඩුවේ අවුල්

    පසුගිය සතියේදී ආණ්ඩුව රාජපක්ෂ පවුලෙන් පළිගැනීම නැවත ආරම්භ කළේය. මේ පිළිබඳව අපි පසුගිය සතියේදී කුරහන් සුවඳ ලිපියෙන් ඔබව දැනුවත් කිරීමට කටයුතු කළෙමු. ජනතාව වෙනුවෙන් සේවය කිරීමට තිබූ දින දෙකක් නිරපරාදේ අපරාධ පරීක්ෂණ දෙපාර්තමේන්තුව තුළත්, පොලිස් මූල්‍ය අපරාධ පරීක්ෂණ දෙපාර්තමේන්තුව තුළත් ගතකිරීමට සිදුවීම නිසා මෙම දින දෙක අහිමි විය.

    මගේ මව වන ශිරන්ති රාජපක්ෂ මහත්මිය අපරාධ පරීක්ෂණ දෙපාර්තමේන්තුවට ගෙන ආවේ තාජුඩීන් ඝාතනය පිළිබඳව ප්‍රකාශයක් ලබා ගැනීමට බව මාධ්‍ය ඔස්සේ විකාශය විය. එය සිරිලිය සවිය සංවිධානයට අයත් වාහනයක් පිළිබඳව ප්‍රකාශයක් ලබාගැනීම සඳහා වූ කැඳවීමක් විය.

    මෙහිදී ඇයගෙන් ප්‍රශ්න කර තිබුණේ, වාහනයේ ටිංකරින් කිරීම පිළිබඳව, වාහනයේ වර්ණය වෙනස් කිරීම,  ආරක්ෂාවට ගිය වාහන මොනවාද යන්න ගැනයි. තාජුඩීන් ගැන කිසිවක් ප්‍රශ්න කර නොතිබිණ. ජනපති ආර්යාවක් සිය ආරක්ෂාව වෙනුවෙන් භාවිත කළ වාහනයක පාට වෙනස් කිරීම පිළිබඳව ලෝකයේ පරීක්ෂණ පවත්වන එකම රට ශ්‍රී ලංකාව විය හැකිය.

    මීට අමතරව මව හා මගේ පියා විවාහකද? හමුවීම සිදුවුණේ කෙසේද? යන්න පිළිබඳවත් ප්‍රශ්න කර තිබුණි. මේ අතර රෝහිත මල්ලිගෙන්ද වාහනයේ පාට වෙනස් කිරීම පිළිබඳව මෙන්ම ඔහුගේ නම, ගම, ආගම පිළිබඳවද ප්‍රශ්න කර තිබුණි. පොලිස් මූල්‍ය අපරාධ ඒකකය රෝහිත මල්ලිගෙන් සුප්‍රීම් සැට් චන්ද්‍රිකාව පිළිබඳවද ප්‍රශ්න කර තිබූ අතර, එයටද ඔහු හොඳින්ම පිළිතුරු ලබාදී තිබුණි. ආණ්ඩුව කළයුතු වන්නේ උඩ තිබෙන චන්ද්‍රිකාවක් පිළිබඳව පරීක්ෂණ කිරීම නොව කඩා වැටුණු හරීන් ප්‍රනාන්දු ඇමතිතුමාගේ බැලුම ගැන සෙවීමය.

    මේ වන විට පොලිස් මූල්‍ය අපරාධ කොට්ඨාසයේ නිලධාරියෙකුට තර්ජනය කළ බව පවසමින් ඔවුන් මා හටද නඩුවක් දැමීමට කටයුතු කරමින් සිටී. මෙය පොලිස්පතිවරයා පිළිබඳව තිබෙන ජනතා අප්‍රසාදය වළක්වා ගැනීම සඳහා කරන කුමන්ත්‍රණයක් ලෙසින්ද හැඳින්විය හැකිය. පොලිස් මූලස්ථානයේදී අහිංසක සේවකයෙකුට පොලිස්පතිවරයා තර්ජනය කරන අයුරු දැක්වෙන වීඩියෝවක් මාධ්‍ය හරහා විකාශය විය.

    නීතිය නමන පොලිස්පතිට එයින් විශාල විරෝධයක් එල්ල වූ අතර, ඔහු සිය තනතුරින් ඉල්ලා අස්විය යුතු බවට මේ වන විට සමාජයේ මතයක් පැතිර යමින් තිබේ.  එවැනි අවස්ථාවක එම මාතෘකාව වෙනතකට යොමු කිරීම සඳහා මා පොලිස් නිලධාරියෙකුට තර්ජනය කළ බවට වන කතාවක් නිර්මාණය කර තිබේ. විහිළුවට කරුණ නම් තර්ජනය කළා යැයි කියන උප පොලිස් පරීක්ෂකවරයා මා හට පොලිස් මූල්‍ය අපරාධ ඒකකයේදීත් හමු නොවීමය.

    පළාත් පාලන මැතිවරණය තවදුරටත් කල් දැමීමට කටයුතු කරන අතරේම ආණ්ඩුව දැන් දැන් ජනතාවට ඡන්ද අල්ලස් ලබාදීමට කටයුතු කිරීමද ආරම්භ කර තිබේ. එහිදී ආණ්ඩුව අන්තර්ජාල බද්ද, යතුරු  පැදි බදු මෙන්ම කුඩා ට්‍රක් රථ සඳහා වන බදුද අඩු කර තිබේ. කුමනාකාරයෙන් හෝ ජනතාවගේ බදු අඩු කිරීම ජනතාවට වාසිදායකය. නමුත් ජනතාවට මේ දෙන්නේ ඡන්ද අල්ලස් බව නම් ඔවුන් අමතක නොකළ යුතුය. එක් අතකින් බදු අඩු කරන ආණ්ඩුව අනෙක් අතින් එම බදු ජනතාවගෙන් අය කිරීමටද කටයුතු කරයි. සීනි සඳහා ආනයන බද්ද රුපියල් අටකින් අඩු කිරීම ඒ සඳහා හොඳම උදාහරණයයි.

    මේ අතර පළාත් පාලන මැතිවරණය තවදුරටත් කල් දැමීමට ආණ්ඩුව උත්සාහ කරමින් සිටියි. මේ සතියේදී පාර්ලිමේන්තුවට ඉදිරිපත් වීමට නියමිත පනත සඳහා තවත් සංශෝධන 25ක් පමණ එක් කිරීමට ආණ්ඩුව සූදානමින් සිටින බවට තොරතුරු වාර්තා වෙයි.

    මේ අතර ආණ්ඩුවේ ඇත්ත තත්ත්වය පිළිබඳව කතා කළ විජේදාස රාජපක්ෂ මහතාගෙන් පළිගැනීමට ආණ්ඩුව කටයුතු කරමින් සිටියි. කෙසේවෙතත් අප මේ බව අවුරුදු දෙක හමාරක් තිස්සේ පවසමින් සිටින අතර, දැන් හෝ එහි ඇත්ත තත්ත්වය  පිළිබඳව විජේදාස ඇමතිවරයා තේරුම් ගැනීම හොඳ දෙයකි. ඒ අනුව සිටිය නොහැකි තැන එළියට පැමිණීමට ඔහු තීරණය කර තිබේ. මේ විජේදාස රාජපක්ෂ මහතාගේ ආරම්භය පමණි.

    මේ අතර රජය නියෝජනය කරන ශ්‍රී ලංකා නිදහස් පක්ෂයේ ජ්‍යෙෂ්ඨ අමාත්‍යවරුන් කිහිපදෙනෙකුම ජනපතිවරයාට රට ගමන් කරනා අසතුටුදායක තත්ත්වය පිළිබඳව කරුණු පැහැදිලි කර තිබේ. මේ අතර සුසිල් ප්‍රේම්ජයන්ත් මහතාද රතු නිවේදනයක් නිකුත් කළේය. මෙයින් පෙනෙන්නේ හවුල් ආණ්ඩුව දැන් අවුල් වී ඇති බවයි.

    ජනතා විමුක්ති පෙරමුණේ නායක අනුර කුමාර දිසානායක මහතා කලින් කලට විවිධ කතා කීමට දක්ෂයෙකි. දැන් ඔහු අපේ හත්මුතු පරම්පාරවේම ඉඩම් යොදාගෙන අපට ඉඩම් 21ක් ඇති බවට ප්‍රකාශ කරමින් සිටී. මෛත්‍රීපාල සිරිසේන ජනපතිතුමා පසුගිය මහින්ද රාජපක්ෂ ආණ්ඩුවේ අමාත්‍යවරයෙකු ලෙස කටයුතු කරන විට පොළොන්නරුවේ වැව් ගොඩකරමින් හෝටල් සකස්කර තිබෙන්නේ ඔහුගේ පවුලේ අයට යැයි අනුර කුමාර සහෝදරයා ප්‍රකාශ කළේය. අගමැති රනිල් වික්‍රමසිංහ මහතාද එයම පැවසීය. මේ පිළිබඳව පරීක්ෂණ කිරීමට ජනතා විමුක්ති පෙරමුණ ඉදිරියට නොපැමිණීමෙන්ම පෙනෙන්නේ  ජනතා විමුක්ති පෙරමුණට ආණ්ඩුව සමග ගනුදෙනුවක් ඇති බවයි.

    මෙතෙක් කුරහන් සුවඳ තීරු ලිපියෙන් අවධානය යොමු නොකළ කරුණකින් මෙවර ලිපිය අවසන් කිරීමට අදහස් කළෙමි. ඒ ශ්‍රී ලංකා ක්‍රිකට් පිළිබඳව වන මාතෘකාවයි. ක්‍රිකට් ක්‍රීඩාවේ පිපිරීම ඉරිදා දඹුල්ලේ පැවති තරගයෙන් පසුව සිදුවිය. ඒ ශ්‍රී ලංකා කණ්ඩායම ලැබූ පරාජයක් හමුවේ ප්‍රථම වතාවට ප්‍රේක්ෂකයන් කුපිත වී කටයුතු කිරීමයි. මේ වන විට තරුණ කණ්ඩායමක් ලෙස ක්‍රමයෙන් නැගී සිටිමින් සිටින කණ්ඩායමට ජනතා සහාය අවශ්‍ය වෙයි. දඹුල්ලේ සිදුවීම කණගාටුවට කරුණකි.

    නමුත් ප්‍රේක්ෂකයන් කළයුතු වන්නේ තවදුරටත් කණ්ඩායමට ශක්තිය දෙමින් කටයුතු කිරීමයි. අමාත්‍ය අර්ජුන රණතුංග මහතා පිළිබඳව විවේචන පැවතියත් ඔහු සෘජුව සිය අදහස් ප්‍රකාශ කරයි. ක්‍රිකට් ක්‍රීඩාවට දැවැන්තම විනාශය සිදුවූයේ යහපාලන රජය යටතේදී බව මේ වන විට ඔහු පවසා තිබේ. ක්‍රීඩාවට දේශපාලනය එක් නොවිය යුතුය යන්න ප්‍රධාන කරුණකි. නමුත් දැන් ක්‍රිකට් ක්‍රීඩාවට සිදුව ඇත්තේ එයයි. තරග දිනීම, පරාජයට පත්වීම සාමාන්‍ය දෙයක් වුවත් පරිපාලනය ක්‍රීඩාවට ඇඟිලි නොගසා පුහුණුකරුට හා ක්‍රීඩකයන්ට නිදහසේ ක්‍රීඩා කිරීමට අවස්ථාව ලබාදිය යුතුය.  

  • බැඳුම්කරය යට ගහන්න රාජපක්ෂ භීතිකාව යළි එයි

    මේ සතියේ කුරහන් සුවඳ තීරු ලිපිය වෙනුවෙන් පෑන අතට ගන්නා විටත් මගේ මව ප්‍රකාශයක් ලබාගැනීම සඳහා අපරාධ පරීක්ෂණ දෙපාර්තමේන්තුවට කැඳවා තිබිණි. ඒ සඳහා ඇය සූදානම් වන අවස්ථාවක මෙවර තීරු ලිපිය ලිවීමට සිදුව තිබේ. මේ අතර දෙවැනි මල්ලි යෝෂිත රාජපක්ෂද අපරාධ දෙපාර්තමේන්තුවෙන් කැඳවා තිබෙන අතර, රෝහිතට පොලිස් මූල්‍ය අපරාධ ඒකකයෙන් කැඳවීමක් ලැබී ඇත.

    මෙය හුදෙක්ම දේශපාලන පළිගැනීම් මත සිදුවන දෙයකි. මගේ මවත්, සහෝදරයන් දෙදෙනාත් දේශපාලනය නොකළහ. දේශපාලනය කළේ මාත්, පියාත් පමණි. ආණ්ඩුවට රාජපක්ෂවරුන්ගෙන් දේශපාලන පළිගැනීම් කිරීමට අවශ්‍ය නම් දේශපාලනය නොකළ අය එයින් ඉවත් කර, දේශපාලනය කළ අය පමණක් එයට යොදාගන්නා ලෙස පැවසීමට කැමැත්තෙමි.

    අගමැතිවරයා ඉදිරියේදී නීතිපති හමුවීමක් යොදාගැනීමත්, ප්‍රධාන මාධ්‍ය හරහා රාජපක්ෂවරුන්ට එල්ල වී ඇති චෝදනා පිළිබඳ පරීක්ෂණ කඩිනම් කිරීමට තීරණය කර ඇති බවත් ප්‍රධාන මාධ්‍ය හරහා ප්‍රචාරය වී ඇති කරුණක් වී තිබේ. ඒ අනුව දිගින් දිගටම ආණ්ඩුවට එල්ල වන විවේචන මග හරවා ගැනීමට ඔවුන් විසින් සෑම දිනකම ඇති රාජපක්ෂ තුරුම්පුව නැවත වරක් ඉදිරියට ගෙන තිබේ.

    ඉදිරි දින තුන තුළදී රාජපක්ෂ පවුලේ උදවිය අපරාධ පරීක්ෂණ දෙපාර්තමේන්තුවට මෙන්ම මූල්‍ය අපරාධ කොට්ඨාසයට කැඳවීම පිළිබඳ මාධ්‍ය හරහාද ප්‍රධාන ලෙසම විකාශය කෙරෙනු ඇත. ඒ සඳහා ජනතාවගේ උනන්දුව වැඩිවීමට ඉඩ පවතින අතර, ඒ හරහා ආණ්ඩුව දින දෙක තුනකට ගොඩ යනු ඇත.

    එසේම නීතිපති හා අග්‍රාමාත්‍ය රනිල් වික්‍රමසිංහ මහතා අතර හමුවක් ඉදිරියේදී පැවැත්වෙන බවටද තොරතුරු වාර්තා වෙයි. මේ හරහා ස්වාධීනව කටයුතු කරන නීතිපති දෙපාර්තමේන්තුවටද ඇඟිලි ගසා ඔවුන් භීතියට පත් කිරීමට ආණ්ඩුවේ ඇතැම් පුද්ගලයන් කටයුතු කරන බව පෙනේ.

    මේ අතර සමෘද්ධිය පිළිබඳ මේ වනවිට රටේ කතාබහක් නිර්මාණය වී තිබේ. විෂය භාර අමාත්‍ය එස්.බී. දිසානායක මහතා පවසන්නේ තමා සහනාධාර නොකැපූ බවයි. ජනාධිපති මෛත්‍රීපාල සිරිසේන මහතාද ඇඹිලිපිටියේ පැවැති උත්සවයක් අමතමින් සඳහන් කළේ තමා කිසිවෙකුගේ හෝ සමෘද්ධිය කැපීමට ඉඩ නොදෙන බවයි.

    තත්ත්වය එසේ නම් ජනතාවගේ මේ සා විරෝධයක් පැන නැගී ඇත්තේ ඇයිදැයි යන්න සොයා බැලිය යුතුය. නමුත් සත්‍ය තත්ත්වය නම් ගම්මානවල දුප්පත් මිනිසුන්ගේ සමෘද්ධිය අත්හිටුවා ඇත.  එසේ සමෘද්ධිය කැපුවේ කුමන පුද්ගලයන්ද යන්න සොයා බැලිය යුතුය. මේ අතර තංගල්ලේ ලියුම් බෙදමින් පවසා ඇත්තේ සමෘද්ධිය ලබාගැනීමට අවශ්‍ය නම් දිලිප් වෙදආරච්චිට හා මහින්ද අමරවීරට අභියාචනා ඉදිරිපත් කරන ලෙසයි.  මේ ක්‍රියාත්මක වන්නේ යහපාලනයද යන්න පිළිබඳ ගැටලුවක් පවතී.

    පසුගිය සතියේදී බොහෝ දෙනෙකුගේ අවධානය දිනාගත් ප්‍රවෘත්තියක් වූයේ බැඳුම්කර ගනුදෙනුව සම්බන්ධයෙන් චෝදනා එල්ල වූ විදේශ කටයුතු අමාත්‍ය රවි කරුණනායක මහතා සිය ධුරයෙන් ඉල්ලා අස්වීමයි. නමුත් රවි කරුණනායක මහතා අමාත්‍ය ධුරයෙන් ඉල්ලා අස්වීමෙන් පමණක්ම මෙම ගැටලුව අවසන් නොවේ. රවි කරුණනායක මහතා යනු එක් පුද්ගලයෙක් පමණි. මේ හා සම්බන්ධ ලොකුම හොරු ටික තවම නිදැල්ලේය.

    මේ අතර පොලිස්පති පූජිත් ජයසුන්දර මහතාගේ තවත් ආන්දෝලනාත්මක සිදුවීමක් සමාජ මාධ්‍ය වෙත ඉදිරිපත්ව තිබිණි. ඒ ඔහු විදුලි සෝපාන ක්‍රියාකරවන්නෙකු වෙත පහරදෙන අයුරු දැක්වෙන වීඩියෝවකි. නීතිය නවන බවට කළ ප්‍රකාශයත් සමග ඔහු මුලින්ම ජනතාවට එපා විය. නැවතත් අත්අඩංගුවට ගැනීමේ සිදුවීමක් පිළිබඳ වූ දුරකථන සංවාදයක් හේතුවෙන් ඔහු ජනතාවට එපා විය. දැන් නිල ඇඳුමේ බලය යොදාගෙන ජනතාවට පෙළා දැමීමට ඔහු  කටයුතු කරන ආකාරයටද ජනතාවට එපා වී තිබේ. මේ පිළිබඳ ජනාධිපතිවරයාගේ අවධානය යොමුවිය යුතුය.

    බැඳුම්කර ගනුදෙනුවට සම්බන්ධ බවට චෝදනා එල්ල වූ රවි කරුණනායක මහතා අමාත්‍ය ධුරයෙන් ඉවත්ව පසුපෙළ මන්ත්‍රීවරයෙකු ලෙස කටයුතු කරයි නම්, හම්බන්තොට වරාය බදු දීමේ ගනුදෙනුව දූෂණයක් බවට පවසන විජේදාස රාජපක්ෂ මහතාට එරෙහිව විශ්වා භංගයක් ගෙන ඒමට කටයුතු කරයි නම්, මැතිවරණය කල් දමන බවට චෝදනා එල්ල කරමින් අමාත්‍ය ෆයිසර් මුස්තාෆා මහතාට විශ්වාසභංගයක් ගෙන එන්නේ නම්, පොලිස්පති පූජිත් ජයසුන්දර මහතා වෙනුවෙන් ආණ්ඩුව නියෝජනය කරන මැති ඇමතිවරු ගන්නා තීරණය පිළිබඳවද දැන් ජනතාව සිය අවධානය යොමුකර තිබේ.

    හම්බන්තොට වරාය චීනයට බදු දීමට ආණ්ඩුව ගත් තීරණය පිළිබඳ කුරහන් සුවද තීරු ලිපියෙන් මීට ඉහත සතියකදී අප ඔබව දැනුවත් කරමින් පැවසුවේ හම්බන්තොටට හිලව් වශයෙන් ශ්‍රී ලංකා ජනතාව සතු තවත් වටිනාම සම්පත් කිහිපයක් ඉන්දියාවට ලබාදෙනු ඇති බවයි. එහිදී අපි සඳහන් කළේ මත්තල ගුවන්තොටුපොළ හා හම්බන්තෙට තෙල් ටැංකි ඉන්දියාවට පවරනු ඇති බවයි. දේශපාලනිකි වශයෙන් විජයදාස රාජපක්ෂ මහතා සමග මතභේදයක් පැවැතියත්, හම්බන්තොට වරාය පිළිබඳ ඔහු කළ  ප්‍රකාශයට අප පූර්ණ වශයෙන් සහයෝගය දෙන්නෙමු.

    හම්බන්තොට බදු දී එහි උණුසුම පහව යන්නටත් පෙර මේ වනවිට ඉන්දියාව මත්තල වෙනුවෙන් ඩොලර් මිලියන 250 ක් ආයෝජනය කිරීමට සූදානම් වෙයි. ඒ සඳහා අවසර දීමට අදාළව කැබිනට් මණ්ඩල අනුමැතිය ලබාගැනීමට අදාළව කැබිනට් පත්‍රිකාවක්ද පසුගිය කැබිනට් මණ්ඩලය ඉදිරිපත් කර තිබිණි. ඒ අනුව අපගේ පුරෝකථන සාර්ථක වෙයි. හම්බන්තොට හා මත්තල ආරම්භය පමණි. මේ ආකාරයට ශ්‍රී ලංකා ආර්ථිකයට වැදගත් තවත් ආර්ථික මර්මස්ථාන කිහිපයක්ම ඉදිරියේදී චීනය, ඉන්දියාව ඇතුළු රටවල් විසින් ගිලගැනීමට නියමිතය.

    ලබන සතියේදි යළිත් හමුවෙමු!

    ඔබට සුබ අනාගතයක්!

  • බැඳුම්කර පාඩුව හිලව් කිරීමට සමෘද්ධිය කැපීම

    2015 වසරේදී සිදු වූ බැඳුම්කර වංචාව පිළිබඳ ඒකාබද්ධ විපක්ෂය දිගින් දිගටම පාර්ලිමේන්තුව තුළත්, ඉන් පිටතදීත් කතා කිරීමේ ප්‍රතිඵලයක් ලෙස ජනාධිපති මෛත්‍රීපාල සිරිසේන මහතා ඒ පිළිබඳ සොයා බැලීම සඳහා ජනාධිපති කොමිසමක් පත් කළේය. ඊට පෙරාතුව අග්‍රාමාත්‍ය රනිල් වික්‍රමසිංහ මහතා එක්සත් ජාතික පක්ෂයට සම්බන්ධ පුද්ගලයන්ගේ කමිටුවක් පත්කර බැඳුම්කර වංචාව පිළිබඳ සොයා බැලීය. එම කමිටු වාර්තාවට කුමක් සිදුවීද යන්න පිළිබඳ දැනගැනිමට නොහැකි වූ අතර, එහිදී වරදක් සිදුව නොමැති බවට සඳහන් වූ බව එකල වාර්තා විය.

    මේ පිළිබඳ කෝප් කමිටුවද වාර්තාවක් සකස් කළේය. මත දෙකක සිටියද කෝප් කමිටු සභාපති සුනිල් හඳුන්නෙත්ති මහතා එහිදී බැඳුම්කර වංචාව පිළිබඳ රටට හෙළි කිරීමට ආණ්ඩුවේ බලවත් පීඩනය හමුවේ කටයුතු කළ ආකාරයට ස්තුතිය ප්‍රකාශ කළ යුතුය. බැඳුම්කර වංචාව පිළිබඳ විමර්ශනය කරන විට කෝප් කමිටුව දෙකට බෙදුණි. නමුත් අවසානයේදී එක් වාර්තාවක් පැමිණි අතර, එක්සත් ජාතික පක්ෂයට සම්බන්ධ මන්ත්‍රීවරු එයට පාදක සටහන් දැමූහ.

    කෙසේ වෙතත් බැඳුම්කර කොමිසමේදී සිදුවන සාක්ෂි විභාගය අනුව රවි කරුණානයක මහතා පිළිබඳ මේ වනවිට සමස්ත රට තුළම කතිකාවතක් නිර්මාණය වී තිබේ. අප පවසන්නේ ඔහු එක් පුද්ගලයෙකු පමණක් බවයි. මේ වනවිට සමස්ත වංචාවම රවි කරුණනායක මහතා පිට දමා ඇඟ බේරාගැනීමට ආණ්ඩුව කටයුතු කරන ආකාරයක් පෙනෙන්නට තිබේ.

    එසේම රවි කරුණානායක මහතාට එරෙහිව ඒකාබද්ධ විපක්ෂය විසින් අල්ලස් කොමිසමටද පැමිණිල්ලක් ඉදිරිපත් කළ අතර, එම පැමිණිල්ලේ ඉදිරි ක්‍රියාමාර්ග පිළිබඳ මෙතෙක් පැහැදිලි චිත්‍රයක් නොමැත.

    රවි කරුණානයක මහතාගේ සිදුවීමත් සමගින් ඔහුගේ  බිරිඳ හා දියණියක්ද මේ වනවිට බැඳුම්කර ගනුදෙනුවට අදාළව නම් කියැවෙන චරිත බවට පත්ව ඇත. ඒ සඳහා පවුලේ උදවියගේ නම් යොදාගැනීම පිළිබඳ අපි කනගාටුවට පත්වෙමු. එමෙන්ම රවි කරුණානායක මහතාගේ දියණිය කළ ප්‍රකාශයක් අන්තර්ජාලයේ දැකගත හැකි වූ අතර, එහිදී ඇය සඳහන් කර තිබුණේ මීට වඩා ලොකු අය ආණ්ඩුවේ සිටින බවයි. මේ ප්‍රකාශය ඇය වගකීමෙන් කළ ප්‍රකාශයක්ද, එසේත් නොමැති නම් කම්පනයට පත්ව කළ ප්‍රකාශයක්ද යන්න සිතාගැනීමට අපහසුය. බැඳුම්කර වංචාව පිළිබඳ පරීක්ෂණ පවත්වන කොමිසම මේ පිළිබඳවද පරීක්ෂණ පැවැත්වීම වැදගත් බව මගේ අදහසයි.

    එමෙන්ම මහ දවල්, මහ බැංකුවේ සිදු වූ මහා හොරකම සාධාරණීකරණය කිරීමට කෝප් කමිටු වාර්තාවට පාදක සටහන් එක් කළ අය මෙන්ම, මහ බැංකු බැඳුම්කර වංචාව සාධරණීකරණය කිරීමට පොත් රචනා කළ අයද ආණ්ඩුවේ සිටිති. මේ පිළිබඳවද සමාජය තුළ වැඩි කතාබහකට ලක්ව ඇත. සමාජයේ ඇතැම් පාර්ශ්ව පවසන්නේ පාදක සටහන් මෙන්ම, පොත් රචනා කර ඇත්තේ මෙම ගනුදෙනුව හරහා අනියම් වාසි ලබාගත් අය බවයි. ඒ අනුව සමාජයේ පැතිර යන මෙම මතවාද පිළිබඳවද අවධානය යොමු කිරීම වැදගත් වෙයි. ඒ හරහා ඇතැම්විට තවත් වැදගත් සාක්ෂි කිහිපයක්ම විශ්වාස කළ හැකිය.

    මේ අතර ආණ්ඩුව සමෘද්ධිලාභීන් කප්පාදු කිරීමට ආණ්ඩුව කටයුතු කරමින් සිටියි. වාර්තා වන ආකාරයට හම්බන්තොට දිස්ත්‍රික්කයේ පමණක් සමෘද්ධිය අහිමි වූ පවුල් සංඛ්‍යාව 12,000 ක් පමණ වෙයි. වියළි කාලගුණයෙන් මෙන්ම ගංවතුර තත්ත්වයෙන් පීඩාවට පත්ව සිටින ජනතාවට ආණ්ඩුව එල්ල කරන තවත් පීඩනයක් ලෙස මෙම සමෘද්ධි කප්පාදුව හැඳින්විය හැකිය. අසරණ ගොවි ජනතාවට ආසන්න වශයෙන් කන්න තුනක් පමණ වගා කිරීමට නොහැකි වී තිබේ. ඒ හේතුවෙන් ඔවුන්ගේ ආර්ථිකය බිඳ වැටී ඇත. අනෙක් අතින් සහල්, පොල් ඇතුළු අත්‍යවශ්‍ය ආහාර ද්‍රව්‍ය මිලද ඉහළ ගොස් තිබේ. මෙවැනි අවස්ථාවක ආණ්ඩුව කළ යුත්තේ ජනතාවට ලබා දී ඇති සමෘද්ධිය කප්පාදු කිරීම නොව ජනතාවට තවදුරටත් සහන ලබාදීමට කටයුතු කිරීමයි.

    ජනතාවට එදිනෙදා කුලී වැඩ කරගැනීමට නොහැකි තත්ත්වයට පත්ව තිබේ. ආර්ථිකය එන්න එන්නම කඩාවැටෙමින් තිබේ. තවත් අවුරුදු දෙක තුනකින් ජනතාව විශාල ගැටලුවකට මුහුණදෙනු ඇත.

    හම්බන්තොට වරාය චීනයට විකුණා ලබාගත් මුදල් හරහා රටේ ණය බරෙහි වෙනසක් සිදු නොවන බව අපි පසුගිය සතියේදි පැහැදිලි කර පෙන්වීමු. පසුගියදා පැවැති වරාය සංවත්සර උත්වසයේදී ජනාධිපති මෛත්‍රිපාල සිරිසේන මහතා හම්බන්තොට වරාය චීනයට පැවරීමෙන් ලැබුණු මුදලින් වරාය සේවකයන්ට බෝනස් මුදලක් ලබාදෙන බවට කළ ප්‍රකාශය මේ සඳහා හොඳම උදාහරණයයි. රටේ ප්‍රාග්ධන වත්කම් විකුණා හෝ බදු දීමෙන් ලැබෙන මුදල් පරිභෝජන අවශ්‍යතා වෙනුවෙන් යොදාගැනීම අභාග්‍ය සම්පන්න තත්ත්වයකි.

    එසේම වරාය චීනයට පැවැරීමෙන් සිදුවූයේ අනාගතයේදී ඩොලර් උල්පතක් බවට පත්වීමට තිබූ  වටිනා සම්පතක් අහමි කර ගැනීමකි. අනෙක් අතින් එයින් ලැබෙන මුදල් ආණ්ඩුව එදිනෙදා අවශතා වෙනුවෙන් යොදාගැනීම හරහා තවදුරටත් රටේ ණය බර වර්ධනය වෙනු ඇත.

    මේ සඳහා හොඳ උදාහරණයක් දිය හැකිය. මේ සිදුව තිබෙන්නේ ගෙදර  සිටින බේබදු තාත්තා නිවසේ සිටින කිරි එළදෙන මස් කඩයට ලබාදීම වැනි වැඩකි. මස් කඩයට කිරි එළදෙන විකුණා  ලැබෙන මුදලින් මත්පැන් පානය කර, ලැබුණු මුදල් අවසන් වූ විට ගෙදරට කිරිවැස්සිත් නැත, කිරි ටිකත් නැත. හම්බන්තොට වරායටද සිදුවූයේ එවැනි දෙයකි.

    ඔබට සුබ අනාගතයක්!

    ලබන සතියේදී යළිත් හමුවෙමු!

  • හම්බන්තොට වරාය විකිණීම හා රාජ්‍ය දේපොළ පෞද්ගලීකරණය

    ආණ්ඩුව හම්බන්තොට වරාය කුණුකොල්ලයට විකුණා තිබෙන බව පැහැදිලිය. පසුගිය මහින්ද රාජපක්ෂ ආණ්ඩුව හම්බන්තොට වරාය ඉදිකිරීමට කටයුතු කළේ අනාගත අවශ්‍යතාවන් පිළිබඳ මනා අධ්‍යයනයකින් පසුවය.

    මහින්ද රාජපක්ෂ ආණ්ඩුව වරාය ඉදිකිරීමෙන් පසු එය සංවර්ධනය කිරීමටද අදාළ වැඩපිළිවෙළක් සකස් කර තිබිණි. නමුත් 2015 වසරේ පැවැති ජනාධිපතිවරණයෙන් පසු නව ආණ්ඩුවක පත්වීම හේතුවෙන් පසුගිය මහින්ද රාජපක්ෂ ආණ්ඩුව සමයේ ක්‍රියාත්මක කිරීමට නියමිතව තිබූ සැලසුම ක්‍රියාවට නැංවීමට නොහැකි විය.

    වරාය චීනයේ චයිනා මර්චන්ට් සමාගමට ලබාදීමේදී ඉඩම්වල හෝ වරායේ වටිනාකම සත්‍යය ලෙස තක්සේරු කර එය බදු දෙනවා වෙනුවට කර ආණ්ඩුව පවසන්නේ වරාය ඉදිකිරීමට ලබාගත් ණය මුදල පියවීම සඳහා වරාය බදු දීමය.

    නමුත් ණය පියවීම සඳහා චීන රජය සමග එකඟතාවකට පැමිණි බව ආණ්ඩුව කිසිදු තැනක හෝ සඳහන් කර නොමැත. මෙම මුදල් මහා භාණ්ඩාගාරය වෙත පැවැරීමට තීරණය කර ඇති බවද සඳහන් කර තිබේ.

    ඒ අනුව ශ්‍රී ලංකාවට තිබූ වටිනාම සම්පතක් විකුණා ලැබෙන මුදල් ආණ්ඩුවේ එදිනෙදා නාස්තිකාර වියදම් පියවා ගැනීමටත්, ආණ්ඩුවේ ඇමතිවරුන්ගේ වාහන, නිවාස හා වෙනත් දීමනා වෙනුවෙන් වැය කිරීමටත් වැඩි අවස්ථාවක් තිබේ. මේ අතර මාධ්‍ය මගින් වාර්තා වූයේ පළාත් සභා මන්ත්‍රීන් වෙනුවෙන් තවත් රුපියල් 75,000ක දීමනාවක් රජය මාසිකව ගෙවීමට තීරණය කර ඇති බවයි.

    ණය බරින් මිරිකෙන ආර්ථිකයක් තිබේ නම් ආණ්ඩුව මේ ආකාරයට පාර්ලිමේන්තු මන්ත්‍රීන් හා පළාත් සභා මන්ත්‍රීන් වෙනුවෙන් මුදල් වියදම් කරන්නේ ඇයිදැයි යන්න ගැටලුවක් පවතී. එක් අතකට ආණ්ඩුව ඇති විරෝධය මගහරවා ගැනීම වෙනුවෙන් මන්ත්‍රීවරුන්ට අල්ලස් ලබාදී ඔවුන් ආණ්ඩුව දිශාවට එක්කර ගැනීමට දරනු ලබන ප්‍රයත්නයක්ද වනු ඇත.

    මුදල් නොමැති නම් මෙම වැඩපිළිවෙළ සඳහා ආණ්ඩුව රාජ්‍ය සම්පත් හෝ විකුණා මුදල් ලබාගත යුතුය. එහි පළමු අදියර වූයේ හම්බන්තොට වරාය චීනයට පැවරීමට ගත් ක්‍රියාමාර්ගයයි.

    හම්බන්තොට වරාය සඳහා ලබාගත් ණය පියවීම 2036 වසර තෙක් ගෙවිය යුතුය. හම්බන්තොට වරාය සංවර්ධනය කළානම්, ලබාගත් ණය එයින්ම ගෙවීමට අවස්ථාවක් තිබිණි. අනෙක් අතින් වරාය චීනයට පැවරීම හරහා ණය මුදල අඩු නොවන්නේ නම් තවදුරටත් ශ්‍රී ලංකාවේ ණය බර වැඩිවීම පමණක් සිදුවනු ඇත.

    එමෙන්ම කැබිනට් මණ්ඩලයට ඉදිරිපත් කළ වාර්තාවේ සඳහන් කරුණු හා ගිවිසුමේ සඳහන් කරුණු අතර පැහැදිලි වෙනසක් තිබේ. කැබිනට් වාර්තාවේ සඳහන් වූ කරුණු ගිවිසුමට ඇතුළත් නොවී ඇත. ඒ හරහා ආණ්ඩුව චීන රජය පමණක් නොව කැබිනට් මණ්ඩලයද නොමග යවා ඇත. අනෙක් අතින් වෘත්තීය සමිති ඇතුළුව සමස්ත ජනතාව නොමග යවා ඇත.

    නොබැඳි විදේශ ප්‍රතිපත්තියක සිටි ශ්‍රී ලංකාව චීනය සමග හෝ ඉන්දියාව සමග සම්බන්ධතා පැවැත්වීම පිළිබඳ අපට ගැටලුවක් නොමැත. අපට ඇත්තේ මෙම රටවල් සමග ගිවිසුම් ඇතිකර ගැනීමේදී ශ්‍රී ලංකාවට උචිත වන ආකාරයෙන් ගිවිසුම් ඇතිකර ගැනීමකින් තොරව විවිධ රටවල් හා පුද්ගලයන්ට අවශ්‍ය පරිදි ඔවුන්ව සතුටු කිරීමට තාවකාලික ගිවිසුම්වලට පැමිණීමය.

    කේ.පී. සිං නමැති ඉන්දීය දේශපාලන විචරකයෙකු මෙන්ම, රාජ්‍ය සේවයේ සිටි ජ්‍යෙෂ්ඨ නිලධාරියෙකු  පවසා තිබුණේ ශ්‍රී ලංකාව හම්බන්තොට වරාය  චීනයට දීමට පොරොන්දු වූ විට ත්‍රිකුණාමලයේ තෙල් ටැංකි ඉන්දියාවට ලබාදීමට පොරොන්දු වූ බවයි. ඉන් පැහැදිලි වන්නේ චීනය හා ඉන්දියාව අතර පවතින දේශපාලන බල අරගලයේ කොටස්කරුවෙකු බවට ශ්‍රී ලංකාව පත්ව ඇති බවයි. චීනය හා ඉන්දියාවේ ගැටලුවට මැදිහත්ව සිටි අපට අවසානයේදී සිදුව ඇත්තේ රටක් ලෙස ආපස්සට යෑමටය.

    මේ අතර හම්බන්තොට වරාය පෞද්ගලීකරණය කිරීමට එරෙහිව ශ්‍රේෂ්ඨාධිකරණයේ නඩුවක් විභාග වෙමින් පවතී. නඩුවක් තිබෙන අවස්ථාවක හම්බන්තොට වරාය පෞද්ගලීකරණය කිරීම සඳහා ගිවිසුම්ගත වූයේ කෙසේද යන්න ගැටලුවකි. ඒ අනුව මෙම ගිවිසුම් ගත වීම නීත්‍යනුකූල නොවේ.

    රටක අණපනත් මගින් පෞද්ගලීකරණය කිරීමට නොහැකි ලෙස සඳහන් වන නාවික ගමනාගමන ක්‍ෂේත්‍රයද වත්මන් ආණ්ඩුව පෞද්ගලීකරණය කර තිබේ. ඒ අනුව මෙම ගිවිසුම්ගත වීම රටේ පවත්නා නීතියට පටහැණිය.

    එමෙන්ම රටේ කම්කරු නීතිය අනුව රටක දේපොළක හිමිකාරීත්වය වෙනස් වන්නේ නම්, ඒ සඳහා කම්කරු අමාත්‍යාංශයේ අනුමැතිය අවශ්‍ය බවට දන්වා තිබේ. වරාය චීනයට පැවැරීමත් සමග එහි කම්කරුවන්ගේ අයිතිය පිළිබඳ අමාත්‍යාංශය බැහැර වන අතර, ඔවුන්ගේ පාලනය චීන සමාගම විසින් සිදුකරනු ඇත. ඒ අනුව ඉදිරියේදී චීන සමාගමට අවශ්‍ය පරිදි සේවකයන් හැසිරවීම සිදුවනු ඇත. එමෙන්ම ඔවුන්ට අවශ්‍ය නම්, සේවකයන් වරාය රාජකාරියෙන්ද ඉවත් කරනු ඇත.

    හම්බන්තොට වරාය විකිණීමෙන් ආණ්ඩුව මෙරට විදේශයන්ට විකිණීම සිදුකර තිබේ. ඒ අනුව ඉදිරියේදී බොහෝ ජාතික සම්පත්වල හිමිකාරීත්වය ශ්‍රී ලංකාවට අහිමිවෙනු ඇත. අග්‍රාමාත්‍ය රනිල් වික්‍රමසිංහ මහතා පවසන්නේ මත්තල ගුවන් තොටුපොළ ඉදිරියේදී සංවර්ධනය කරන බවයි. ඒ අනුව විදේශීය පාලනයට යටත් වන රටේ ඊළඟ සම්පත බවට මත්තල පත්වනු ඇත.